Presidenti amerikan, Joe Biden, deklaroi të shtunën se Presidenti rus, Vladimir Putin “nuk mund të qëndrojë në pushtet”.

Menjëherë ka reaguar Kremlini, ndërsa Shtëpia e Bardhë tha se deklarata nuk ka të bëjë me thirrje për ndryshim regjimi, transmeton portal arbresh.info

“Për hir të Zotit, ky njeri nuk mund të qëndrojë në pushtet,” tha Biden në përfundim të një fjalimi të mbajtur në Kështjellën Mbretërore në Varshavë.

“Qëndrimi i Presidentit ishte se Putini nuk mund të lejohet të ushtrojë pushtet mbi fqinjët e tij apo rajonin. Ai nuk po diskutonte fuqinë e Putinit në Rusi, apo ndryshimin e regjimit”, tha një zyrtar i Shtëpisë së Bardhë.

Komenti i Biden se Putini “nuk mund të qëndrojë në pushtet” nuk ishte në komentet e tij të përgatitura, tha një zyrtar i Shtëpisë së Bardhë.

Zyrtarët amerikanë më parë kanë deklaruar se largimi i Putinit nga pushteti nuk ishte qëllimi i tyre.

“Për ne, nuk ka të bëjë me ndryshimin e regjimit. Populli rus duhet të vendosë se kush dëshiron t’i udhëheqë,” tha Sekretari i Shtetit Antony Blinken në fillim të këtij muaji.

Përgjigja e Kremlinit: “Kjo nuk duhet të vendoset nga zoti Biden,” tha zëdhënësi i Kremlinit Dmitry Peskov. “Kjo duhet të jetë vetëm një zgjedhje e popullit të Federatës Ruse”./cnn/arbresh.info/